LES TECHNICIENS DU MAROC

Vous souhaitez réagir à ce message ? Créez un compte en quelques clics ou connectez-vous pour continuer.
LES TECHNICIENS DU MAROC

منتدى التقنيين و التقنيات المغاربة


2 participants

    مجموعة من النكت المغربية

    abo imane
    abo imane
    عضو نشيط
    عضو نشيط


    عدد المساهمات : 110
    تاريخ التسجيل : 05/04/2010
    الموقع : البيضاء

    مجموعة من النكت المغربية Empty مجموعة من النكت المغربية

    Message par abo imane Lun 19 Avr 2010 - 22:46





    هادي واحد المرأة، طيبات لراجلها النهار اللول ملوخية
    النهار التاني طيبات ليه خبيزة(الربيع)
    النهار التالت طيبات ليه السبانخ
    النهار الرابع سولات راجلها: أشنو نطيب ليك اليوم؟
    قال ليها: أبلا ما تعدبي راسك، غادي نمشي نسرح بوحدي فالغابة.



    واحد مبوق كيبكي ف السبيطار. سولوه: مالك. قال ليهم: لا والو، غير الوالد مات شوية

    واحد المعلم عزيزعليه يسلخ الدراري. شد واحد الولد وسولو: باش تغديتي اليوم؟
    جاوبو: بالمرقة. هز المعلم العصا وبدا يضرب فيه: ها البطاطا، ها خيزو، ها
    اللفت، ها اللحم، ها البصلة... حتى شبعو عصا
    داز على التلاميد كلهم حتى وصل عند واحد العايق سولو: باش تغديتي؟
    هو يقول ليه: بمسكة
    وقف المعلم شوية يفكر، وهز العصا حتى السما هو يعطيه: ها الكاغيط
    الفوقاني، ها الكاغيط التحتاني، ها نضغ نضغ نضغ نضغ

    واحد مبوق طاح من فوق العمارة وتجمعات عليه الجوقة
    سولوه الناس: أشنو وقع؟
    قال ليهم: ما عرفتش، أنا يالله جيت


    واحد قال لصاحبو: بغيت ندير مفاجأة لمرتي بمناسبة عشر سنين د الجواج
    قال ليه: واشنو غادي تدير ليها؟
    قال ليه: غادي نديها للشينوا.
    قال ليه صاحبو: الله ياودي! إيلا ف عشر سنين ديال الجواج ديتيها للشينوا،
    أشنو غادي تدير ليها ف العيد الخمسين د الجواج ديالكم؟
    قال ليه: غادي نمشي نجيبها من تما.


    هادا واحد سمع الغوات عند الجيران ف نصاصات الليل ومشى يشوف أشنو واقع،
    قالو ليه الماء ديال الروبيني فيه التسمم.
    رجع الراجل لدار،و وسولاتو مرتو: أشنو واقع؟ قال ليها راجلها: والو ما وقع.
    شربي ليك شي كاس ديال الماء ونعسي

    واحد هبيل صايم واتصل ببرنامج الإهداءات قال ليهم: بغيت مقطع من أذان المغرب

    هادا واحد مكلخ طاح ف الدروج . خرج ليه الطبيب بومادة و قال ليه دهن
    بلاصة الطيحة. ناض المكلخ كيدهن ف الدروج

    هادا واحد مشى للفرماسيان وقال ليهم: بغيت الحليب ديال الدراري الصغار
    قال ليه مول الفرماسيان: أشنو سميتو؟
    قال ليه: مروان

    هادو تلاتة د المراوات كيعيقوا على بعضياتهم.
    وحدة قالت ليهم: أنا راجلي غادي يشري المعاريف كله
    وهي تقول التانية: أنا راجلي غيشري التور إيفيل اللي فباريس
    وهي تنقز التالتة قالت ليهم: وشكون اللي قال ليكم راجلي باغي يبيع؟


    هادا واحد ديما كيهز شي حاجة من دارهم. واحد النهار شفر بورطابل ديال خوه. ناضوا تاصلو بالتيليفون من الدار، قالو ليه رد البورطابل. وقال ليهم: نتوما أي حاجة تمشي لصقوها فيا!

    هادا واحد ناشط مشى عند مول الحانوت قال ليه: عندك قنبولة ديال 180 ريال؟
    بغيت نضحك مع مالين الدار.
    قال ليه مول الحانوت: زيد درهم و شري بوطة صغيرة و هجرو ليهم.

    هادي قنية مريضة بزاف و ضارها راسها، قال ليها الفكرون: ما تخممش، أنا نمشي نجيب ليك الدوا.
    القنية جلسات تسنى ساعة، ساعتين، حتى داها النعاس. الغد ليه فاقت والفكرون باقي ما رجع. ناضت طلت من الشرجم لقاته قدام الباب. قالت ليه:طلق راسك، أنا اللي مكلخة معولة عليك.
    قال ليها الفكرون: غادي تحترمي راسك أولا ما بقيتش غادي


    واحد المعلم ضرب واحد الولد كيقرى عنده و قال ليه: راه غير عزيز عليا،
    داكشي علاش كنضربك إيلا ما درتيش التمارين
    قال ليه الولد: كون غير قدرت نبادلك نفس الشعور


    هادا واحد مول الطاكسي مبوق! مزيان غادي ف المدينة و هي تشير ليه واحد
    المرأة. وقف و طل عليها من الشرجم و قال ليها: فين غادية أ لالة؟
    قالت ليه: السوق أ سيدي
    هو يقول ليها: يالله سيري و متعطليش

    هادا واحد الأستاد نوض واحد الكسول للسبورة، و كتب ليه صفر و سولو: أشنو هادا؟
    جاوبو الكسول: صفر
    زاد ليه الأستاد تلاتة ديال الأصفار, و عاود سولو: و دابا؟
    جاوبو الكسول: صفرالاف، و صفرمئة ،و صفرة و صفرين

    واحد الدري مودة هادي ماشاف واحد صاحبو، قال والله حتا نمشي نسول عليه،
    مشا لدار ديالهم دق دق، خرجات أمو، سولها، قالت ليه اولدي ! من داك النهار
    سخرناه يجيب اللحم مارجاعش
    قال ليها و شنو درتو؟؟ قالت ليه طيبنا الدجاج

    قال لك هذه امرأة ميريكانية..و فرنسية و مغربية..سولوهم على الحاجة اللي
    شرطوا على الراجل و حققها..
    -الميريكانية قالت: أنا النهار الأول قلت له ماكنعرف نطيب..النهار الثاني
    ماشفت والو..النهار الثالث جاب طباخة..
    -الفرنسية قالت: أنا النهار الأول قلت له ما كنعرف نصبن..النهار الثاني
    ماشفت والو..النهار الثالث جاب مكينة د الصابون..
    -المغربية قالت: أنا النهار الأول قلت ما كتعرف نطيب و لا نصبن..النهار
    الثاني ماشفت والو..النهار الثالث..وليت كنشوف شويا بالعين اليمنية

    هدا واحد الاستاذ سول التلاميذ شنو هي النجمة بالفرنسية، واحد التلميذ عرفها ولكن هو حشومي قالها لصاحبو الكسول، ذاك الكسول قال للاستاذ "ليطوال "
    الاستاذ تعجب او قاليه ركبها في جملة، جاوب الكسول اللي طوال ارجعو اللور و اللي قصار ايزيدو لقدام .
    avatar
    maymouna


    عدد المساهمات : 14
    تاريخ التسجيل : 28/04/2010
    العمر : 35

    مجموعة من النكت المغربية Empty Re: مجموعة من النكت المغربية

    Message par maymouna Jeu 20 Jan 2011 - 16:59

    أضحك الله سنك و أدام الله فرحك وسرورك

      La date/heure actuelle est Jeu 28 Mar 2024 - 13:54